東方日報新聞
 


東方日報功夫茶


手機費不獲津貼 官老爺腦大生草

【東方日報專訊】老一輩形容一個人聰明卻唔肯走正路,會話佢「叻歸左」。勞工及福利局局長羅致光號稱IQ一百六十,唔好好諗吓點樣「便民利民」,反而一門心思鑽研如何「虐民辱民」,正正就係大大個人辦。


尋日立法會開會討論綜援計劃下嘅補助金及特別津貼,例牌又係炮聲隆隆,有議員批評現時嘅津貼只涵蓋固網電話費,流動電話費閣下自理,令長者無法接收關於醫院等嘅資訊,怒插官老爺「離地」。羅致光今次係就係冇學似之前咁頂心杉撐到行,但就大玩拖字訣,聲稱今年底會完成檢討津貼制度,預計二○二○/二一財政年度可以實施新嘅補助金及特別津貼。


咪玩喇,你估家陣仲係「水壺」大哥大年代咩?今時今日手機已經成為市民生活必需品,反而屋企裝固網電話嘅買少見少,當局就算唔提供手機費用津貼,起碼都應該畀人二揀一。況且羅局長自己都認喇,年紀愈大搵工愈難係「不爭嘅事實」,以佢老哥正值「中年」嘅精明腦袋,冇理由諗唔到長者如果連手機都冇,搵工唔敢四圍去,只可以坐定定喺屋企望天打卦,豈不是頂磨盤踩高蹺──難上加難。


所以話,羅局長唔單止「離地」,更加係「衰到貼地」。明知固網電話逐漸淘汰都唔肯與時並進,擺明就係「多一事不如少一事,少一事不如冇件事」嘅慣性官僚思維使然。西諺話「冇穿冇爛,咪去修理」,港產官僚就「千瘡百孔,闊佬懶理」,深得道家「無為而治」、「垂拱九重」之三昧,抵佢地支美國總統級薪水!


咁好嘞,家陣議員鬧爆,大家估吓羅局長又會唔會從善如流吖嗱?咪畀人批中,特衰政府就算跌落地都要熯番拃沙,津貼你班「廢老」手提電話費吖嘛,冇問題,唔該提供番通話同埋上網紀錄,證明真係搵工用途,長者想攞番有關津貼,好可能比攞四千銀仲難吖。


大家有眼睇,特衰政府喺民意怒潮之下跪低派四千銀,結果市民淨係填份水蛇春咁長嘅Form已經填到發忟憎,明明上網申請快夾妥,政府偏係要市民打晒蛇餅排隊攞表,市民攞嗰幾千銀要過五關斬六將,仲慘過去乞。再講番收緊長者綜援呢筆,港府話就話跪低補番一千蚊差額,但硬係要留低條尾巴,對拒絕搵工者課以二百蚊「象徵式懲罰」。羅局長到依家仲擇惡固執,講到尾都係「虐民為樂」心理作祟,只要可以玩謝市民,花再多時間心力財力都在所不惜。


始終都係嗰句︰官視民如草芥,民視官如寇讎。高官民望低處未算低,冇靈魂政府廢到冇朋友,家陣知點解喇!