即時新聞
 


體育


神之手插入西甲 加藤鷹之子投雷加利斯? (17:36)


(互聯網)



【on.cc東網專訊】AV+足球,有冇得諗先?西甲球隊雷加利斯日前宣布,簽入20歲嘅日本後衞井手航輔,雙方簽約到2020年。本來一單普通轉會消息,就算係涉及日本新星,都未至於好大件事,不過有傳媒就發現,呢位井手航輔嘅爸爸,疑似係日本AV神級男優、有「神之手」之稱嘅加藤鷹,仲話井手航輔會係日本出戰東京奧運嘅秘密武器咁話添!

先講講呢個井手航輔來歷,佢喺美國加州出生同成長,父母都係日本人。佢出身自洛杉磯銀河青訓,近季就喺德國第4級別聯賽球隊亞琛效力。能夠兼任左右閘嘅佢,身高有1米70,能夠講包括日文、英文、德文同西班牙文,對於佢喺球壇發展肯定大有幫助。今次佢加盟雷加利斯,預計會被調去球隊B隊喺低組別聯賽磨練,佢就話希望可以將來成為職業球員好好發展咁話。另外,佢仲未代表過美國或日本國家青年軍上陣,而嚟緊一旦日本真係考慮搵佢,據聞佢非常樂意披起「藍武士」戰衣。

好喇,再講番點解傳媒會估佢係加藤鷹個仔。原來「神之手」喺2014年接受《東京體育報》訪問曾經透露,佢同前妻一共生咗3個仔女,其中16歲大仔當年正喺洛杉磯銀河青訓受訓,另外仲有兩個女添!加藤鷹當時好驕傲咁話過,佢個仔遺傳咗佢嘅快腿,係個速度型前鋒。咁當年網友就已經搵過銀河青訓資料,當時同加藤鷹所講吻合嘅,正正係井手航輔,加上日媒都發現井手航輔係有兩個妹妹,唯一資料唔啱係井手航輔係踢後衞而非前鋒。

雖然井手航輔冇承認過相關傳聞,但點都好,日本有新星去西甲球會都係好事,話唔定大家喺東京奧運見到佢,到時再睇睇「神之手」有冇去睇波為「阿仔」打氣啦!

支持本地運動員,一齊去「睇體」!
https://bit.ly/2DxX4XI 

東網體育FB同你追實體壇每個精彩時刻!
http://bit.ly/2ecTF2A 



(互聯網)


(互聯網)


(互聯網)