即時新聞
 


體育


【人物誌】三浦長壽秘方:咁食意粉‧‧‧‧‧‧ (18:00)






【on.cc東網專訊】51歲嘅三浦知良宣布同FC橫濱續約,唔少球迷都質疑成件事只係「噱頭嘢」,不過數據比起任何嘢都有說服力,三浦目前50米跑只需7秒,1000米就3分30秒跑完,1500米係5分30秒,12分鐘可以跑畢3200米,呢個數值有幾恐怖?

日職川崎前鋒教練篠田洋介話:「我哋班球員跑1000米係3分20秒,1500米大概5分20秒左右,三浦同我哋嘅平均值差不多,即係話佢拍住啲廿歲後生仔。」換言之,「King Kazu」嘅速度、耐力比實際年齡年輕30年。

三浦Keep得咁好其中一個重要指標在於Lean Body Mass,就係「除脂肪體重」數值,簡單嚟講就係減少脂肪同肌肉嘅比例。一般而言,人類由20至50歲之間,肌肉量一直下降,相對脂肪含量會增加。假如「除脂肪體重」數值保持得好,肌肉流失少,身體機能自然強健如青壯年,所以佢日日都會磅一次體重。

當今球壇LBM數值最勁係葡萄牙球王C朗拿度,佢由踢職業波起計10年,數值上升咗10公斤,即係肌肉比以前更發達,難怪成33歲人嘅爆炸力,都好似後生仔一樣。

咁身高1.76米、體重71.5公斤嘅三浦知良,數值係幾多?條計算公式係咁:體重-(體重×身體脂肪率÷100),結果如下:

71.5-(71.5×9.2÷100)=64.922公斤

三浦知良咁多年嚟呢個數值冇乜點變,保持得非常靚,除咗生活規律,每晚9至10點就上床瞓覺,球季休戰期仲自己跑步舉鐵Keep Fit,以今年1月歇冬期為例,佢有13日朝早5點就起身,日練3課,真係少啲意志力都死。

仲有一樣,就係飲食原則係保持「高蛋白低脂」。三浦喺賽前食意大利粉從來唔落醬汁,只用橄欖油同鹽調味,減少油脂攝入,據講意大利一代射手恩沙基同樣有咁嘅習慣。雖然佢喜歡食油炸嘢,但每次都要徹底吸乾啲油,而且唔會食肥膩嘅霜降肉,幾乎刻苦過苦行僧。

做人做到咁辛苦為乜?咪理想囉!三浦知良自律成咁,抵佢長踢長有嘅。

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI