即時新聞
 


體育


阿仙奴拉隊開笑氣P 球員即場失去意識! (09:00)






【on.cc東網專訊】近期狀態大勇嘅阿仙奴,被踢爆拉隊開「笑氣P」!英國《太陽報》爆料,佢哋得到一段8月份(球季開結前幾日)嘅影片,片中奧斯爾、奧巴美揚、拿卡錫迪等多位球星開Party,場內除咗有香檳同伏特加酒之外,一眾球員更輪流吸有「合法毒品」之稱嘅笑氣,法國新星古安杜斯吸完之後更一度瞓喺梳化上,疑似失去意識!

報道指派對地點係倫敦一間私人會所,連埋多款烈酒在內,Party埋單要成2.5萬鎊至3萬鎊,而且仲有70位女士獲邀參加,不過今次出席嘅球員幾乎係阿仙奴所有正選,幾貴嘅單都唔使憂。片段中最令人驚訝一幕,係球員輪流傳住吸笑氣汽球,奧斯爾吸完後即翻白眼半攤喺梳化,到古安杜斯吸完後直頭成個人扒低唔郁,懷疑一度失去意識,奧巴美揚、拿卡錫迪同哥拉辛拿斯都有被影到吸笑氣,同場嘅米希達利恩同梅斯達菲就未有被影到。

有現場人士爆料:「佢哋買咗一罐笑氣入嚟輪流吸,場面好狂野,奧斯爾吸咗一大啖之後,一度好似失去意識,成個人喺梳化滑咗落去,佢哋又鼓勵另一個鬈髮新人(古安杜艾斯)試,佢試完之後情況仲衰!一班青年人模範竟然就去試啲咁危險嘅嘢,實在難以置信!」

笑氣含含一氧化二氮,係一種無色有甜味嘅氣體,有輕微麻醉作用,被稱為「笑氣」係因為吸入後會令人有快感、致人發笑。雖然「笑氣」未列入毒品目錄,不過就做到吸毒嘅感覺同效果,而且吸笑氣並唔係違法,所以被人冠以「合法毒品」之名。

唔少人以為笑氣「好安全」,但其他笑氣屬於危險化學品,英國《BBC》曾指出,短暫接觸笑氣會令人產生興奮感覺,但同時亦會對精神狀態造成影響、導致缺氧,並誘發血壓喪失、頭暈,甚至突發心臟病,長期吸食會引發貧血、抑制骨髓發育,甚至出現中樞神經系統中毒,由於極容易得到,所以喺英國非常受年輕一代歡迎。

東網體育FB同你追實體壇每個精彩時刻!
http://bit.ly/2ecTF2A 

支持本地運動員,一齊去「睇體」!
https://bit.ly/2DxX4XI