即時新聞
 


體育


【金句王】福仔踢得少?莫帥反擊寸到核爆 (06:37)


(互聯網)



【on.cc東網專訊】曼聯幾時都係球迷焦點,再加上有個金句王教頭莫連奴,唔受注目就奇!近期前鋒拉舒福特嘅出場時間成為熱話,唔少聲音都認為福仔於紅魔落場機會唔夠,影響呢名天才射手發展。於今輪英超賽前訪問,寸王就長篇大論、用大量數據進行大反擊,當中句句都有骨!

福仔於國際賽周,兩為英格蘭上陣分別射破西班牙同瑞士大門,唔少評論都話寸王唔識用福仔,仲話莫連奴根本唔信任呢名10號仔,寸王於今次訪問有備而來:「講起拉舒福特,周日嘅報紙又會插我插到上天花板,話我點解唔出福仔。不過對唔住,佢唔出場係因為停賽關係,呢點我一定要提你哋。另外我唔係為記者你哋,而係為咗曼聯球迷,唔介意花費兩分鐘同大家解釋吓。16/17球季,福仔踢咗32場聯賽、11場歐霸包括決賽、3場英足盃、6場英聯盃包括決賽,仲有社區盾。」

「佢有53次出場,總共踢咗3068分鐘,如果除開90分鐘,即係上陣34.2場賽事。」

「17/18年球季,佢上陣35場聯賽、8場歐聯、5場英足盃、3場英聯盃同歐超盃,佢踢咗52場賽事共2676分鐘,即係出咗29.7場賽事。兩季夾埋,佢踢咗105場,5774分鐘,即係63.7場賽事,當中包括5場決賽。」

「佢唔係蘇蘭基(利物浦)、羅夫度斯卓克(車路士)、卡維特利雲(愛華頓),佢係拉舒福特,曼聯重要一員,而且有足夠出場時間,並於最高水平賽事落場。所以各位曼聯球迷,你哋應該知道球會係點對福仔、盧基梳爾、連格同麥湯米尼,我哋只會用最好方法去對待佢哋。」

延伸閱讀:
【神邏輯】寸王:普巴冇話走 即係想留!
https://bit.ly/2p6rTJI 

東網體育同你追實體壇每個精彩時刻! 
https://goo.gl/ewVpvE