即時新聞
 


體育


違約金1億歐 皇馬借將林良銘目標西甲 (22:00)


林良銘大好前途。(互聯網)



【on.cc東網專訊】周中喺西班牙盃幫艾美利亞踢足全場嘅中國小將林良銘,原來係個皇馬球員,只係近兩季都畀「銀河艦隊」外借去艾美利亞,依家喺西乙踢波。由於成為咗史上首個喺西盃踢足全場嘅中國球員,林良銘近日都人氣勁升,有國內傳媒仲搵到佢做專訪,了解吓佢外流之路,兼發現原來佢份合約違約金達到1億歐元,認真犀利呀!

唔少球會都怕球員踢出名堂之後,畀其他大球會硬搶球員,因此合約都會定落一個違約金,亦即係買斷合約價。林良銘自爆佢同皇馬張約違約金去到1億歐元,都可以話係中國球員歷史新高。

林良銘嚟咗西班牙3年,今季喺艾美利亞,暫時都只係可以踢西班牙盃,事關踢西乙係有外援限額,競爭激烈,不過佢話明自己目標係他日進軍西甲,暫時都無意返國內發展。至於話問佢點睇自己喺艾美利亞前景,林良銘話原來依家艾軍個教頭係佢當年踢皇馬B隊時同一個教頭,一直都好欣賞佢咁話,咁希望佢真係會爭氣,踢好波,喺西甲攞到好成績啦!

東網體育同你追實體壇每個精彩時刻! 
https://goo.gl/ewVpvE 



曾經同包括C朗在內一眾皇馬一線球星慶祝農曆新年。(互聯網)


林良銘喺艾美利亞爭取表現。(互聯網)