即時新聞
 


體育


亞冠盃 全城力撐傑志掃「雷」! (23:25)


傑志強陣迎戰柏雷素爾。



【on.cc東網專訊】上輪作客以0比1僅負柏雷素爾的傑志,相隔一周後,周三(14日)晚8時假香港大球場再於亞冠盃E組分組賽與對手碰頭。面對以強陣出擊的柏雷素爾,傑志主帥朱志光坦言有心理準備踢硬仗,並指球隊上下經過3場的亞冠分組賽後,經已開始適應比賽模式。
(Now 633周三晚8時直播)

傑志賽前有好消息,前鋒佐迪及守衞列斯奧均被列入大軍名單上,兩人會否上陣仍有待觀察其狀態再作決定。主教練朱志光透露,球隊已就柏雷素爾的踢法作出適當的部署,並於近幾日的操練中作預演︰「其實上星期作客對柏雷素爾,我哋喺比賽中頗為被動,對手係一支幾有實力嘅球隊,喺攻守方面都好貫徹,仲畀咗好多壓力我哋。今次返到主場,我哋都唔敢睇小呢支球隊,比賽時會好集中,特別被對方壓迫時要處理得好啲,同埋點樣將個波踢番上前場,我哋近幾日喺呢方面有重複練習。」

「藍鳥」已適應亞冠節奏

「朱Sir」亦表示,「藍鳥」經過3場亞冠盃分組賽後,經已開始適應比賽節奏︰「我哋有心理準備嚟緊兩場亞冠比賽會幾有壓力,因為兩場對手都要爭出線權,甚至得失球都要爭取。柏雷素爾係一支強隊,我哋經過幾場亞冠比賽後,球員同我都開始適應。譬如上場後備上陣嘅伊東純也入楔能力強,結果一走甩就輸波,所以我哋喺呢方面會特別留意。」

下平隆宏認唔易應付

至於「藍鳥」守衞唐建文則指球隊已準備好︰「我哋準備好充足,雖然知道實力冇對手咁好,但我哋唔會認輸,全隊目標都好清晰,就係要攞分。我希望球隊同球迷可以好享受同投入,無悔咁比賽,希望多啲球迷入場見證傑志亞冠主場比賽。」

剛於上周末的日職以1比1戰和大阪櫻花的柏雷素爾,今仗作客以「夫添」來港出戰,主教練下平隆宏表示,上場主場對傑志並不容易應付,最終只射入1球,球隊已就該仗表現作分析。對於今晚會否安排上仗後備上陣的基斯坦奴達施華及伊東純也兩名進攻主力出任正選,下平隆宏則拒絕透露,但表示一眾球員上仗對大阪櫻花後,狀態尚算不錯。


雨戰不利防守 成敗睇個天?

根據天氣預測,今晚比賽有機會出現雨戰的情況,對於天雨所構成的影響,傑志主帥朱志光坦言,場地濕滑將會令防守工作更加困難︰「如果天氣唔係咁理想,會擔心唔係咁多球迷入場支持我哋,令球隊氣勢上冇咁好。假若場地濕滑,令比賽節奏快咗,會令我哋更難去防守,因為對手速度頗快,如果個波流得快,可能出嘅錯會多啲,希望到時天氣唔好太惡劣。」至於柏雷素爾主教練下平隆宏則認為,除非比賽期間滂沱大雨令球場出現積水,否則問題不大。



傑志主帥朱志光指球隊已適應亞冠的比賽模式。


柏雷素爾球員備戰態度認真。