即時新聞
 


體育


【有片】大炒愛爾蘭!丹麥趕上尾班車 (05:37)

【on.cc東網專訊】即去睇全場精華:http://bit.ly/2ifAMhd 

丹麥周二喺世盃外歐洲區附加賽,作客愛爾蘭合演次回合賽事。雙方喺首回合窿窿打和,仲以為次回合都會係差唔多,點知變咗入球騷。丹麥喺先落後一球嘅情況下,憑住基斯甸艾歷臣大演帽子戲法,以5:1大炒對手,趕上決賽周尾班車!

主隊開波6分鐘,就憑一次罰球攻勢,丹麥球員解圍唔靚,沙恩杜菲近門頂入,領先1:0。丹麥落後一球即時反攻,避開兩次被拉開比數嘅危機之後,29分鐘就由車路士後防安達斯基斯坦臣近門射入追平。丹麥追平之後開始嚟料,3分鐘後一次反攻,基斯甸艾歷臣妙射中楣底彈入。

雙方之後開始互攻,而且埋門都好近磅,但係第4個入球就要等到63分鐘,艾歷臣再次表演,禁區頂面對兩名愛軍守將,起左腳射入左邊死角,愛爾蘭門將戴倫蘭杜夫只可以企定定睇住個波入網。艾歷臣今仗腳風順到不得了,73分鐘多得對方守將幫佢控定個波,呢位熱刺中場衝埋去大腳一抽,比數改寫成4:1。

完場前「Lord賓」賓特拿射入12碼埋齋,丹麥以5:1大勝對手,錯過上屆巴西世界盃後再次進身決賽周。

東網體育同你追實體壇每個精彩時刻!
http://bit.ly/2ecTF2A