即時新聞
 


體育


【港超專版】莫耀強:李輝立唔係球棍無掠水! (23:44)


莫耀強炒樓幫標準流浪脫貧。



【on.cc東網專訊】莫耀強,66歲,與不少獅子山下木屋區成長的「白手興家生意人」一樣,小學畢業後因家貧而輟學,邊做邊讀夜校提升自己!捱過辛酸再創業,再有如玩「大富翁」般以地產致富,但這「精明生意人」16年來卻一直投資着本地足球這「蝕本行業」!不過,最近莫生卻利用其對樓市的慧眼,為標準流浪進帳近1,200萬,賺取「第一桶金」協助這支被稱為「搭棚」球隊,增加培育新秀本錢!

圖/文︰司徒子文

雖然創業靠錶針生意,但莫生卻透露致富仍要靠樓市:「我哋公司有地產部,係最搵錢部門!最經典就係十幾年前,我用2,600蚊一呎買胡忠大廈,依家升到每呎16,000蚊,連政府都要向我租嚟用!」

買賣工廈3年進帳逾千萬

眼光獨到的莫生,於3年前就為標準流浪於荔枝角投資2,200萬,買入6,000呎工廈作訓練基地,當時很多人都話貴……誰知道今年以3,400萬轉售,一來一回賺了1,200萬,為這一向「手緊」球會增添本錢!莫生自信地表示:「我買樓買慣買熟,一見好就要買,見好價就要賣!」

在本地足球壇,10個班主有11個都是「蝕住做」!莫生自從2001年入主流浪後,16年都無間斷「倒錢落海」,問到為何樂於做蝕本生意,他直言但求開心:「有啲班主追求名利,每年掟幾千萬出嚟,玩幾年就唔玩!而我就睇得長遠啲,只求為香港球壇培育新秀,幫得到就幫,每年雖然慳住慳住,但細水長流好襟玩……有時候打開報紙見到港隊入選名單,見有5、6個係流浪出身,就會好滿足!」

就是因為欠缺班費,每年莫生都要忙於「碌人情卡」找不同贊助,積少成多來籌募經費,亦因此而被外間稱為「搭棚隊」!有時候更被球迷取笑球隊打了半季夠分護級後便「hea踢」,對此莫生直言要平反:「我哋班費有限,好似上年賜B(楊賜麟)咁踢咗半季好波,人哋畀成3萬幾蚊一個月撬走佢……雖然覺得可惜,但我都想球員生活好啲,咁惟有放手啦!季中有主力離隊,自然成績下滑,球迷就話我哋『hea踢』,不過見到球員搵到食,都叫做欣慰!」莫生更表示每次談及盧均宜、林嘉緯、陳偉豪等港隊主力都是來自流浪,每每令其倍感自豪。

豪擲2,700萬購新會址

縱然班費緊絀,但為了培訓年輕球員,莫生對球隊訓練的投資卻是不惜工本:「後生仔打港超聯就梗係唔夠人哋踢,技不如人就要靠氣力,所以我一直主張要一日練兩課!如果球員喺早晚兩節訓練中間,可以有個地方做健身或休息吓,進步一定可以好大!我賣咗荔枝角訓練基地後,就喺九龍灣訓練場附近,用2,700萬買番個地方做會址,咁就可以做到有效訓練!其實我對球會嘅投資好大,只係外間唔明白!」


為李輝立平反︰Philip冇掠水!

找莫生做專訪,當然要他談一談其身邊的「球圈火辣人物」標準流浪總監李輝立(圓圖)!莫生直言要為他平反:「呢十幾年嚟,有好多人同我講,Philip成日『掠水』、係一名『球棍』,唔好信佢!但事實上,佢真係為球隊而好慳,唔會使多你一毫子!我哋有會計師核數,條數作唔到大,吞唔到錢!呢個人天生死慳死抵,搞到有時候我都唔高興佢,我成日同佢講『你唔好咁啦,對球員好少少啦!』但Philip就係咁知慳嘅人,即使呢刻我畀3,000萬出嚟,佢使到1,200萬我都話佢叻!老實講,其實搞呢啲中型班,唔慳住嚟使就無辦法細水長流,可能佢真係好刻薄,獎金都要逐分鐘計,變咗好多人唔鍾意佢,但Philip對本地足球壇、對流浪嘅貢獻,絕對係功不可沒。」



「莫生」對流浪能夠培育出優秀球員感到安慰。


60有6的「莫生」對足球依然有心有力。