即時新聞
 


本地


政Whats噏:倡榕樹頭文化納非遺 蔣麗芸博留任 (16:18)


蔣麗芸認為榕樹頭文化應該納入非物質文化遺產。(郭詠欣攝)



【on.cc東網專訊】講起油麻地榕樹頭,相信唔少老一輩嘅香港人,都會記得當年平民夜總會歌舞昇平嘅日子,不過今日(16日)榕樹頭下卻隱現另類角力賽。話說今年2場立法會九龍西補選圓滿結束,民建聯鄭泳舜及認為可被稱作建制派嘅陳凱欣進身議會後,流言四起,聲稱民建聯九龍西議員蔣麗芸(Ann姐)或會被勸退。不過,今日一年一度嘅九西活動「油麻地榕樹頭節」,Ann姐連續4年出席,其餘九西議員就唔見影,唔通Ann姐瞓身做嘢博表現,希望扭轉局勢?

油麻地街坊福利事務促進會自4年前開始舉辦「油麻地榕樹頭節」,並由油尖旺區議員、民建聯油尖旺支部主席楊子熙主力籌辦,絕對係區內年度盛事,唔少街坊踴躍參與活動,以推廣油麻地歷史文化。每年出席嘉賓人數多不勝數,上至局長下至街坊會會長,可以話係區內舉足輕重嘅活動之一,舊年仲未做立法會議員嘅鄭泳舜都有出席,兼落場參加木頭車競技賽添。

大會每年都會邀請嘉賓一齊以奇裝打扮出席活動,更貼心備妥各款服飾喺裝身區任君選擇。今日Ann姐就揀咗一件歐洲貴族禮服,成個皇后咁樣,已經壓到場喇,到佢講嘢時更加毫不留情,點名要求民政事務局局長劉江華做嘢。

Ann姐話,劉江華早幾日請飲奶茶、食蛋撻,話呢啲係佢成功申請做非物質文化遺產(非遺)嘅嘢,諗諗吓,榕樹頭文化都應該申請埋非遺喎。佢仲話,應該將公園恢復舊貌,畀人喺樹下講古、唱南音同睇相,佢每次嚟到都會覺得每棵榕樹都講緊古仔,見證住油麻地過去百幾年嘅歷史,彷彿聽到有人唱「冷得我騰騰震」,希望可以延續到呢個文化。

無可否認,九西建制派有人滿之患,但距離換屆仍有約2年時間,不論鄭泳舜或陳凱欣,其立法會資歷尚淺係不爭事實。Ann姐今鋪出盡牙力都叫劉江華做嘢,仲「盛裝」打扮出席,似係博留任,更似係用行動證明其中流砥柱身份。大家即管睇吓下一屆誰領風騷喇!



民政事務局局長劉江華。(郭詠欣攝)