即時新聞
 


請輸入股票號碼/名稱

財經


譚朗蔚:騰訊副偈就快撻番着 (00:08)






【on.cc東網專訊】富昌金融研究部總監譚朗蔚在東方產經「魚缸趣譚」專欄中表示,承接周三同大家討論過的話題,大市係咪見咗頂?因包括內房、本地地產、蘋果概念股以至於5G等板塊都出現了散水的迹象,我答案係肯定的(肯定未呀!)。

前文出街當日,恒指又再挑戰過大時代的最高位28,588點,但無功而還,確實係令人有點洩氣。古語有云:「一鼓作氣,再而衰,三而竭。」有時我都會諗,市底係強啫,但假如恒指三次上試28,588點不果,後市又會是個怎樣的光景呢?

不會的,我諗多咗啫,內地於十九大前正路有維穩,歐洲加泰羅尼亞的假獨立為憂慮降溫,美股三大指數於周三又全部破頂。再睇埋市寬吧,目前超過了七成於紐約主板掛牌的股份都企穩了200日線的分水嶺,該比率創了過去半年來的新高。橫睇豎睇,我都睇唔到港股有看淡的誘因,就連自家的強弱指標都反映大市硬淨,我唔理喇,衝多次真係唔掂先講啦!

今日想同大家講吓隻股王騰訊(00700)。有好多人唔明,點解其股價企於350蚊成個禮拜,好似點咗穴咁呢?有傳中央政府正尋求入股騰訊喎,咁都唔升?你醒吓啦,這並非利好的因素嚟的!當局有鑑於此前集團對視像平台的監管疏忽,才借入股同派員來插手集團的營運咋。長遠而言,此舉可能會削弱集團營運的自主性同吸金的能力。

不過,隨着集團於內地經濟的影響力日益擴大,市場對微信同視頻平台有審查一早已經妥協啦,不會拖累到股價喇。

騰訊股價於近日無大進展,但是348.4元的上月阻力破了,後市走勢依然向好。市傳從集團分拆出來的閱文集團正進行上市聆訊,不排除於閱文的招股明細同騰訊股東的保證配額出台時,副引擎就會撻番着啦!

富昌金融研究部總監 譚朗蔚(作者為註冊持牌人士,持有騰訊)
─ ─ ─ ─ ─ ─
「東網Money18」新推的「板塊追蹤」,助你分析抓緊投資先機
http://money18.on.cc/info/liveinfo_industry.html

「致富智庫」領悟理財/職場智慧,一Click改變一世
http://money18.on.cc/wealth