即時新聞
 


巨星


Encore唱13首!學友跳足全場:證明我係得 (02:18)


學友係堅!



【on.cc東網專訊】「歌神」張學友歷時兩年的巡迴演唱會,終返回最終站香港,他於頭場《A CLASSIC TOUR學友‧經典-香港站‧再見篇》,同Fans玩「Kiss Cam」小遊戲,勝出幸運兒可得到一份特別禮物,而得獎結果就於學友唱經典情歌《你的名字我的姓氏》中公布,學友臨唱畢《你》時,台上電視機及舞台面同時投射出得獎情侶,隨即獲學友送贈有親筆簽名兼寫上祝福語的「錫錫畫」,剛巧撞正女Fans正日生日,由學友帶領全場大合唱生日歌向她送上祝福。

然後學友再問全場Fans演唱會好睇?問完他膽怯話:「問呢個問題其實好冒險,但今次同團隊都出咗120分努力,希望大家鍾意睇,同時又可以發掘到自己潛能,有諗過就嚟6張嘢(60歲)做唔做到㗎?但嚟到219場就證明我係得嘅!畀我做到一生做得最好嘅事,之後我會繼續努力。」學友又向Fans承諾之後會再帶來另一演出、甚至或會帶着表演衝出香港,說畢便向Fans鞠躬,全場Fans即拍爛手掌!

跳足全場

學友接着唱出金曲《愛是永恆》及《祝福》,唱《祝》時有多位身穿宮廷服的Dancer出來跳舞,而學友更同其中一位女Dancer「挑機」跳舞,自嘲快將「登六」的學友喺成個騷簡直由頭跳到落尾,非常精彩!

Encore唱足13首

於Encore環節,學友換上終極銅色燕尾服唱出以多首經典歌串連起來的Medley,其中唱到第一首歌《用餘生去愛》時,升起舞台的螢光幕上播出學友同幾位已經離世藝人照片,包括有張國榮、羅文、梅艷芳、黃霑、柯受良等人合照,用歌向他們致敬。然後繼續Medley接連唱出《心如刀割》、《離開以後》、《一千個傷心的理由》、《只想一生跟你走》、《我等到花兒也謝了》、《分手總要在雨天》、《吻別》、《每天愛你多一些》、《李香蘭》、《Amour》、《情已逝》,唱到最後一首《如果.愛》時,現場化身成嘉年華場面,學友被眾小丑加冕皇冠及大袍後,手執氣球向Fans道別。

----------------------------
東網巨星開咗ig喇,大家快啲follow啦!
https://bit.ly/2JjSVcr



呢對觀眾就係幸運兒。


學友送贈有親筆簽名兼寫上祝福語嘅「錫錫畫」。


學友坦白話懷疑過自己就嚟「60」,究竟做唔做到。