即時新聞
 


東網巨星


【余德丞昏迷】陳豪唔睇電視:今日先知! (17:45)


陳豪(右圖右)坦言好擔心余德丞嘅情況,並祝對方早日康復。



【on.cc東網專訊】藝人陳豪出席咖啡機活動,由於該品牌一直與他旗下的咖啡生意合作,所以今次宣傳可謂雙贏。談到咖啡生意,陳豪開心表示:「生意穩步上揚,不過做生意有好多學問,自己都學習中,好彩OK啦。(你有好多夥計?)由本來2個去到依家約20人,有pop up store,嚟緊會有實體店,詳情遲啲公布啦!我都期待自己個『BB』成長嘅!」

談到劇集《跨世代》拍檔余德丞昏迷,陳豪坦言:「唔好意思,平時我唔係好開電視,所以今日先至知。當然擔心佢,希望佢早日康復,佢前途無可限量呀。(傳余德丞可能患心肌炎。)香港好多人都可能有隱疾,我都係早兩年開始健身先至好留意自己嘅身體狀況,突然心跳幾下唔好以為冇事,大家要正視問題,身體係我哋嘅本錢。(會否探余德丞?)我諗現時唔係咁適合,我會喺精神上支持佢。」



陳豪今日先至知余德丞昏迷。


陳豪透露佢嘅咖啡生意OK。