即時新聞
 


東網巨星


有心思又環保!鍾舒祺教整布利是封 (21:11)


好想收到鍾舒褀依個咁有心思嘅環保小紅包呀!



【on.cc東網專訊】派利是係農曆新年嘅傳統之一,每一封利是都代表住一個祝福,如果想有心意又環保啲,不妨學吓歌手鍾舒褀(Sukie)整番個「DIY心意小紅包」。雖然Sukie未婚,但係每年都會大派利是,仲會去買啲紅色布親手縫製「小紅包」,喺上面縫上朋友嘅名,只需三、四分鐘就完成,認真快手!她說:「我最鍾意整啲手工藝去畀啲朋友,以前我會整晒呢啲小紅包畀成公司嘅朋友,因為我知道自己嘅金錢有限,所以惟有畀多啲心意各位。」雖然Sukie每年都會廣派「小紅包」,不過佢就話今年決定要「減產」限量派發,她笑言:「我都未結婚。」

一雙巧手 盡得父母真傳

Sukie表示學到一手好針黹全靠父母:「我阿爸同阿媽嘅針黹都好厲害,媽咪以前成日去行百貨公司同睇雜誌參考啲童裝衫,之後自己買布整畀我同家姐着。」Sukie仲透露除咗「小紅包」之外,平時都會整好多小巧嘅工藝品:「我好鍾意用針線縫嘢,去外國讀書之前,我知媽咪會好掛住我同家姐,所以親手整咗一啲代表我哋嘅公仔畀媽咪陪住佢,個公仔到依家阿媽都仲擺喺屋企。」

忙到冇時間交電話費

近年四圍飛嘅Sukie話今個新年都會留港陪屋企人,不過講到新年嘅願望,忙到電話費都唔記得交嘅Sukie就笑言希望可以大掃除:「我好想清咗我擺衫間房,想將一啲新淨但係已經用唔着嘅衫捐咗佢,因為實在太多啦!」



鍾舒褀有一雙巧手,原來係盡得父母真傳。


鍾舒褀每年都會親手縫製小紅包㗎!


一針一線都係出自鍾舒褀一雙巧手。