波經
 



即場短訊


皇馬+NBA 皮里茲話有得諗喎

【on.cc東網專訊】皇家馬德里係西班牙著名綜合性體育會,入面除咗大家最熟悉嘅足球部之外,查實仲有極多體育項目都有玩。就好似佢哋嘅皇馬籃球隊,其實一樣係歐洲最頂級勁旅,而根據西班牙著名嘅《阿斯報》爆料,話皇馬主席皮里茲家陣有個大計,就係要將佢哋籃球隊搭路進軍NBA,希望十年之內,可以安排到皇馬喺NBA爭逐,以至挑戰冠軍!要將皇馬籃球隊帶去NBA,皮里茲個如意算盤其中重要一環,梗係離唔開個錢字,事關儘管皇馬籃球隊戰績唔差,但每年依然錄得高達2,500萬歐元虧損,而一旦球隊成功進軍NBA,預計收益將會大增,自然係理想發展方向。根據《阿斯報》報道,皮里茲打算直接去搵NBA總裁施華去傾,然後爭取將皇馬安排入NBA東岸賽區去打,目標係10年之內成事,而呢個對於年屆72歲嘅皮里茲嚟講,可能係佢為球隊最後一個最大型貢獻。介紹番吓皇馬籃球隊先,係歐洲絕對係頂級勁旅,佢哋喺西甲贏過35次冠軍,27次贏得國王盃,同時仲有10次贏得歐聯,最近一次係喺2018年。睇番依家NBA,效力達拉斯嘅20歲超新星當錫,就係喺皇馬出道,如果將來皇馬真係進軍NBA,當錫回歸重披皇馬戰衣真係唔出奇呀!立即參加「賞您睇」: https://tinyurl.com/y2e6pmwk Click下面粒掣,儲on.cc coins!機票、家電、超市禮券、過萬份獎品等緊你。


 專欄輪住嚟 新球季新挑戰

 港超聯 富力R&F繼續用燕子崗