波經
 



即場短訊


香港隊 葉鴻輝:年輕人需要多啲機會!

【on.cc東網專訊】10年前,葉鴻輝初次入選香港隊;10年後,葉鴻輝已是港隊首席門將,更憑多次出色表現獲「英雄輝」的稱號。如今即將步入「而立之年」的葉鴻輝已74次為香港隊上陣,相比起紀錄,他更在乎的,是展示「香港精神」:「呢個紀錄唔係咁緊要,最緊要係香港隊有成績,希望有更加多嘅年青人可以上到嚟,等佢哋去破呢個紀錄。自己由第一場開始到依家,個初心到依家都係咁強烈,每一場香港隊比賽都希望搏到盡,落場希望表現到香港隊嘅精神畀人睇。」4年前,「阿輝」在零封中國隊後曾說球迷的支持是球員最大的動力;4年後,「阿輝」感激球迷再次讓他充滿能量:「今場氣氛好好,我哋好多球員賽前都講,愈多球迷入場,對我哋球員動力更加大,今場見到喺咁好嘅氣氛下,我哋係可以踢出好強嘅拼勁。」常言道:「未來是屬於年輕人的。」作為隊中其中一位「老大哥」,「阿輝」即使「已上岸」,但他未有「離地」︰「香港隊好多嘢都專業咗,同我10年前相比,喺比賽背後所有嘢都專業咗好多,我哋球員受惠咗好多。當年喺球場比較多華人球員,依家可能入藉兵比較多啲,我諗呢個問題係需要正視,唔係話入藉兵唔好,佢哋有佢哋嘅能力,大家都見到其實佢哋可以幫到香港隊手,但長遠嚟計我覺得應該要用番多啲本地年青球員,今日睇到其實『羅梓』(羅梓駿)同『均仔』(鄭兆均)兩個嘅表現都好好,咁係咪可以喺嚟緊嘅賽事,可能畀多啲機會佢哋?始終球隊依家好多球員都三十幾歲,4年後佢哋肯定踢唔到,反而後生嗰班4年後就當打,我哋係咪應該畀啲機會佢哋吸收多啲經驗,等佢哋當打嘅時候,真係可以踢出最好嘅水準出嚟?」他續說︰「年青球員都要靠自己本身,心態同能力好嘅,好自然會受到教練嘅賞識,譬如『均仔』(鄭兆均)今次係一個補選嘅角色,但係落到場一啲都唔怯場,表現畀人嘅感覺好成熟,唔似一般年青球員。」


 全球最貴球隊係佢哋 PSG都要行埋一邊

 香港隊 初嘗大港腳滋味「羅梓」:多謝球迷