波經
 



即場短訊


【賽後解碼】阿仙奴開季喜「揚揚」

【on.cc東網專訊】今晚英超頭場之一,阿仙奴靠箭頭奧巴美揚一箭定江山,作客以1比0擊敗「喜鵲」紐卡素,盡顯上季神射手風範,近14次聯賽對紐卡素贏咗13次,果然係「喜鵲」剋星。阿仙奴今仗有奧斯爾及哥拉辛拿斯避戰,箭頭拿卡錫迪、貴價新兵尼高拉斯比比及丹尼施巴路斯等則先任後備,反而讓2名英格蘭小將雷斯尼爾遜及祖爾韋洛克擔正,亦係自1998年2月對水晶宮以來,「兵工廠」首次喺英超起用兩名20歲以下嘅「幼獅」打正選,可見主帥艾美利堅大膽。開波後紐卡素略佔上風,先有中場舒維爾勁射中柱,前鋒祖連頓殺入禁區快射,亦過唔到客軍門將賓特尼奴,上半場互交白卷。易邊後阿仙奴有番啲起色,奧巴美揚嘅快速入楔僅僅畀主隊後衞閂出底線,呢位上季英超神射手之一未有氣餒,58分鐘佢接應美蘭尼爾斯妙傳單刀破網,終於打破僵局。其後新兵尼高拉斯比比及丹尼施巴路斯分別落場,最終阿仙奴小勝1比0,近14次聯賽鬥紐卡素豪取13勝僅1敗,堅剋「喜鵲」。奧巴美揚上季以22球,與利物浦孖寶穆罕默德沙拿及沙迪奧文尼同獲英超金靴,今仗冇好拍檔拿卡錫迪下仍成功開齋,極速上力,呢位射手喺頭50場英超轟33粒,只有舒利亞(41球)、高爾(41球)、穆罕默德沙拿(35球)及菲臘斯(34球)於頭50場英超入波比佢多,「羊羊」認真犀利。同時間另一場英超,李斯特城主場悶和狼隊0比0。


 方丈模式 寸王批死曼聯車仔冇力爭標

 港超聯 楊賜麟:想踢多啲同入波