波經
 



即場短訊


一戰創3大恥辱紀錄 沙利等執包袱

【on.cc東網專訊】車路士於周一(11日)凌晨英超,以0:6慘敗於曼城腳下,一場比賽創下3個近30年嘅羞恥紀錄。首先,車路士對上一次輸6球或以上敗仗,已經要追溯至1991年4月,以0:7不敵諾定咸森林。第二,車路士繼上次作客0:4輸畀般尼茅夫,今場作客再吞曼城6蛋,係自從1990年12月以來,首次於頂級聯賽連續2場作客都失4球或以上。第三,車路士今場不敵曼城,已經7場對英超「Big6」球隊未贏過,期間只獲得2和5負,可以話係遇強即屈,咁又點爭標呢?值得一提,頭兩項羞恥紀錄都係班主阿布拉莫域入主之前發生,換言之今場敗仗成為「阿布年代」最差紀錄,肯定激死呢位俄羅斯富豪。阿布以往一見成績唔理想,就會換帥,強如曾經為球隊捧過英超冠軍嘅摩連奴、安察洛域、干地,都一樣冇情講。更何況現任主帥沙利未有盃落袋,已經令阿布面目無光,因此好大機會只有一季貨仔,就要執包袱。除咗成績唔掂,沙利仲有一宗罪,就係得罪陣中王牌夏薩特,佢早前指呢位比利時國腳並非領袖型球員,仲話唔介意佢離隊。摩連奴第二度執教車仔期間,因為同夏薩特不和,成為下台原因之一,沙利隨時步佢後塵。賽後沙利承認面臨巨大壓力,仲話會唔會被炒,需要問高層,似乎已經聞到魷魚香。阿布以往鍾意請意大利名帥,當今合佢心水嘅意國人,相信只有祖雲達斯教練阿里基,之前都盛佢教埋今季就會離開意甲,尋找新挑戰,啱晒時間上「車」。東網體育FB同你追實體壇每個精彩時刻!http://bit.ly/2ecTF2A Follow東網體育IG一齊撐本地運動員!http://bit.ly/2EYxoRh 


 車仔大敗 曼聯先至係大贏家

 【賽後解碼】雲尼斯奧斯就係皇馬嘅未來