波經
 



即場短訊


【賽後解碼】曼城炒車 因為哥帥一句話

【on.cc東網專訊】曼城大勝車路士6:0,令人大感意外,但其實「藍月亮」領隊哥迪奧拿早前經發出「大勝預告」,事緣哥帥前排講過,今季英超好可能需要以得失球差,決定冠軍誰屬。因此,曼城餘下賽事都要爭取贏多幾球,到時一旦真係要計得失球,就有着數。哥迪奧拿前幾日話:「今季爭標形勢好緊湊,有人認為最後要計得失球差,我絕對同意,但我並唔會要求場場都大勝5:0,只會講前題係必須贏波,跟住先至講入幾多球,最好唔好失波。」曼城今場超額完成任務,贏夠6粒兼不失球。事實上,曼城雖然依家同利物浦同分,但踢多1場,需要利物浦輸1場,曼城先至係真正追平對手,到時曼城嘅淨得球就可以發揮作用。現時曼城淨得球係54球,比利物浦多10球,「藍月亮」要Keep住贏之外,亦要等待紅軍輸波,今場大勝就有價值。英超對上一次要用得失球差決出冠軍係2011/12年球季,主角又係曼城,當時曼城最後1場補時險勝昆士柏流浪3:2,同曼聯同得89分,曼城比紅魔鬼多8個淨得球,相隔44年再嘗頂級聯賽冠軍滋味,莫非今季又歷史重演?東網體育FB同你追實體壇每個精彩時刻!http://bit.ly/2ecTF2A Follow東網體育IG一齊撐本地運動員!http://bit.ly/2EYxoRh 


 曼聯復甦唔係大晒 迪基亞續約要搵呢個數

 車仔大敗 曼聯先至係大贏家