波經
 



即場短訊


屙到瞓唔着照入波 韋拿杜姆真紅軍英雄

【on.cc東網專訊】利物浦今輪英超終於爭氣,主場3:0擊敗般尼茅夫搶番榜首,中場韋拿杜姆居功至偉!呢名荷蘭國腳原來比賽前好唔舒服,上吐下瀉屙到比賽前一晚瞓唔到,但佢今仗打出超水準射入一球,成為贏波功臣。高普賽後都話韋拿杜姆仲係病緊,當入波後見到球員攬住佢,都驚佢會傳染畀隊友!韋拿杜姆從上季就奠定紅軍正選位置,於歐聯決賽以正選身份落場,今季亦都係球隊重臣。呢名荷蘭好波之人專做中場串連,平時上陣唔覺佢好突出,但利物浦之前兩場聯賽一冇佢,成班波就走晒樣痛失4分,可見韋拿杜姆嘅重要性。今仗賽後高普表示,韋拿杜姆近兩晚不斷嘔吐,比賽前一晚仲要肚屙,但明顯因為佢太重要,利物浦亦再冇失分空間,故高普選擇派佢上陣。韋拿杜姆今仗走上走落,仲要射入靚笠射,呢名5號仔嘅鬥志認真驚人,對紅軍絕對不可或缺。支持本地運動員,一齊去「睇體」!https://bit.ly/2DxX4XI 東網體育FB同你追實體壇每個精彩時刻!http://bit.ly/2ecTF2A 


 【有片】Bye Bye喇!騎師韋達!

 土產設計師操刀 港產特色馬術賽道叻出國際