波經
 



即場短訊


阿古路戴帽 曼城炒車仔6蛋

【on.cc東網專訊】周一(11日)凌晨英超大戰,曼城主場鬥車路士,出現驚人賽果,曼城上半場竟然閃電領先4:0。換邊後,阿古路完成帽子戲法,最終以6:0狂勝車路士,曼城以較佳得失球差,力壓同分嘅利物浦,重返榜首,但曼城踢多1場,餘下每場都要搏盡搶分。開波唔夠4分鐘,曼城趁車路士未企穩陣腳,就由史達寧後上勁射打開紀錄,原本好快可以拉開紀錄,點知阿古路近門失機。不過,呢位阿根廷國腳喺13分鐘將功贖罪,於禁區頂射入世界波。最恐怖係5分鐘後,曼城又入波,車仔中場巴克里頭槌回傳唔湯唔水,變成「助攻」阿古路近門射入。曼城得勢不饒人,24分鐘根度簡學阿古路,同樣喺禁區頂射入靚波。車路士本來可以入番1球,但柏度洛迪古斯半單刀起腳,卻被艾達臣摩拉斯擋出,希古恩凌空抽射,又被艾達臣摩拉斯救到,曼城上半場已經領先4:0,爆出60倍半場波膽。下半場曼城仍然控制大局,50分鐘阿古路接應左路傳中,頭槌攻門可惜中楣,但曼城有的是機會,好快博到12碼,阿古路主射入波,完成帽子戲法。車路士只有零聲反擊,佐真奴費路、夏薩特射門都唔中目標。曼城領隊哥迪奧拿見有大把在手,踢到60幾分鐘,已經換走阿古路、奇雲迪布尼,但場上球員仍然意猶未盡,79分鐘史達寧再一城,今場個人梅開二度,協助曼城大勝車路士6:0,創下球隊今季聯賽最大勝仗。賽後車路士領隊沙利直接走人,唔同曼城領隊哥迪奧拿握手,真係輸到嬲咗,由副手蘇拿代佢同哥帥握手。東網體育FB同你追實體壇每個精彩時刻!http://bit.ly/2ecTF2A Follow東網體育IG一齊撐本地運動員!http://bit.ly/2EYxoRh 


 佢真係沙拿?點解後生咗10年

 【賽後解碼】鐵人孫興民又入波 歐聯靠晒佢