波經
 



即場短訊


亞洲盃 中國贏「賓仔」外籍電玩兵團 

【on.cc東網專訊】中國隊周五晚喺亞洲盃C組賽事,雖憑武磊起孖,于大寶埋齋,大勝菲律賓3球,但係「賓仔」表現絕對唔失禮,控球率達45.1%,同54.9%嘅中國,攔截成功率高達91.7%,高過中國成30%,完全有得打,上半場早段菲律賓仲壓到國足班人非常狼狽添。點解一支亞洲弱旅,可以令南韓、中國咁頭痛呢?要由一款「足球遊戲」菲律賓講起!件事發生喺將近14年前,一名菲律賓球迷喜歡玩一種用球員真實數據為基礎嘅足球遊戲,佢喺遊戲發現英超豪門車路士青年軍,有一對菲律賓雙重國籍嘅「洋哈斯本」兄弟(Younghusband)存在,於是大為傳播。菲律賓足總喺2005年成功游說占士同菲爾兩兄弟,着上菲律賓國家隊波衫,仲參加埋11月東南亞運動會。自此,菲律賓嘅「多國球探」開始四出尋寶。至今屆亞洲盃決賽周,菲律賓已經由雙重國籍球員做骨幹,全隊23名戰將中,除咗兩人之外,其他都係雙重國籍歸化國腳。當中包括上場波力阻黃義助梅開二度,令南韓苦戰僅勝一球嘅27歲龍門米高•法卡斯加特(Michael Falkesgaard),佢生於丹麥,視前曼聯鋼門舒米高為偶像,身高1.91米嘅身材,亞洲唔係咁多守門員可以具備。仲有曾以一腳禁區外窩利,嚇到南韓門神金承奎標冷汗嘅米克•奧特(Mike Ott),就係個23歲德裔歸化球員,出身於慕尼黑1860青年軍,佢嗰位26歲哥哥曼奴•奧特(Manuel Ott)今次都有入選,司職中場。後衞線上,34歲嘅艾華路•施華(Álvaro Silva)、24歲嘅佐藤大介(Daisuke Sato)就分別有西班牙同日本血統。靠住呢支「聯合國部隊」,菲律賓喺國際足協嘅排名由2005至2006球季嘅第191位,一直呈上升趨勢,目前更升至歷史最高嘅第116位,仲高過排141位嘅香港。要知道,港隊自1958年起6戰菲律賓,取得4勝1和1負,其中1996年嘅亞洲盃賽事,甚至狂數對方8比0,2010年友賽都贏4比2,但隨後2011、2013年兩場友誼賽,港隊只和3比3同輸0比1,足見菲律賓嘅援兵威力。支持本地運動員,一齊去「睇體」!https://bit.ly/2DxX4XI 東網體育FB同你追實體壇每個精彩時刻!http://bit.ly/2ecTF2A 


 竊看風暴!列斯聯間諜被捕 林柏特叫停操練

 ABL 連勝告終 李琪「寄望下場好表現」