波經
 



即場短訊


【拿仁紅心】有咗佢 紅軍一季攞多廿分

【on.cc東網專訊】韋斯達維特攞過歐霸錦標、杜迪克十二碼守贏歐聯、連拿亦有英足盃冠軍獎牌,但近廿年利物浦最強門將,肯定係艾利臣比加。喂拿仁,佢嚟咗三個月咋喎!一名真正嘅頂級球員,就係強到可於短短時間內鶴立雞群,佢或者只係剛加盟,又或者只係好細個,但偏偏就可用實際表現展現卡士。美斯坐穩巴塞正選時,都只係十八歲。拿仁身為利迷,睇過歐聯決賽嘅卡利奧斯,數月後望見愛隊換來艾利臣,話我係勝利球迷又好,唔知咩叫YNWA精神又好,心中只能感謝上天。英超第一場上陣鬥韋斯咸,未見佢對手有幾犀利,先見其腳下功夫,多次精準長傳送到隊友腳下。高普戰術由後場開始,艾利臣力足成為反擊嘅第一點,嗰陣就明白,點解高普非要艾利臣不可。紅軍目前12勝3和,成創會126年開季最佳成績。盲都見到埃及文明神奇不再,點解利物浦成績不退反升?艾利臣就係關鍵。佢多次於門前挺身而出屢作神救,淨係睇番近兩場聯賽,冇佢對愛華頓勇救安祖高美斯近門勁頂,就算比克福特完場前派膠都攞唔晒三分;剛作客般尼完場前勇救對手六碼頭槌,跟手再掟出精準五十碼長傳,造就梳頓沙基利埋齋,2:2變1:3。擊敗般尼後,英國評述員丹尼米斯話:「因為艾利臣同雲迪積克,利物浦再唔需要踢得好先贏到波,因為佢兩個實在出類拔萃。」艾利臣一次又一次帶領紅軍由輸變和、和變贏,加埋全球身價最高後衞華基爾雲迪積克,一條防線由被笑到面黃、去到本季牢不可破,簡直帶拿仁返到侯利亞時代----當年希比亞加軒索斯扼守中路,入一粒就收你皮,依家睇紅軍後防再有安穩感覺,心臟終於有得抖。只要艾利臣一直打出水準,憑佢個人之力,一季力足幫紅軍攞多廿分。艾利臣今季唔係冇出過事,對李斯特城於門前送禮,紅軍幾乎嘔番兩分。但超級球星就係可以極速調整心理、於錯誤中吸取教訓,而不影響往後演出。美斯一直攞唔到世界盃,就係因為心臟不夠強大;但如果美斯連呢個弱點都冇埋,佢就真係唔係地球人。●麥馬拿仁


 召喚雲爺爺出山 A米先搵前廠長幫拖

 慘中隊友轟頂膝撞 蘇保迪昏迷腦震盪!