波經
 



即場短訊


【有片】蘇兆輝出神鞭 華山論劍殺敵突圍!

【on.cc東網專訊】今晚跑馬地國際騎師錦標賽,真係刺激過華山論劍!跑完頭三關後,代表愛爾蘭嘅簡國能贏「金匯昇」、英國代表蘇兆輝摘下次關「歐洲之星」及華人之光何澤堯贏「小島怡情」,三人各贏一場,另外美國殿堂級好手卡素蘭奴亦有兩席亞軍,蘇兆輝(22分)、簡國能(16分)、何澤堯(12分)及卡素蘭奴(12分),就係剩番呢四位騎師可以爭逐最終殊榮! 去到最後第八場三班谷一哩,神鞭大俠蘇兆輝開超必,騎住21倍冷門「勝利專家」直路照帶出,雖然亞軍天下第一高手莫雅匹「紅運發財」狂追,但蘇兆輝神鞭連揮,真係頂到尾先過終點,共得34分贏冠軍,第二名係簡國能、而第三名係何澤堯。神鞭大俠蘇兆輝一舉擊敗東邪(日本代表李慕華)、西毒(歐洲莫雅)、南帝(澳洲布文)同北丐(美洲卡素蘭奴),破紀錄四關全上名得兩冠一亞一季、順利成為今屆騎師賽新任盟主!蘇兆輝之後接受記者訪問,說:「今晚一切都非常順利,我要捏一下自己才相信真的獲勝了。這樣美好的時刻,是錢也不能買到的。今晚現場氣氛無與倫比,你可以聽到觀眾為你打氣喝采。要成為今晚的冠軍確實需要一點運氣,但能夠擊敗一眾如此強勁的對手,那種感覺實在非常美妙。」


 專欄輪住嚟 大內總務的日常

 識貨喎!修咸頓搵到呢個新教頭揸Fit