波經
 



即場短訊


【世盃有片】巴西補時兩粒 尼馬失控喊爆

【on.cc東網專訊】即睇全場入球精華:https://bit.ly/2IfWYC0 周五(22日)世界盃早場,E組巴西打頭陣兼創先河,球星尼馬博到12碼,得而復失,成為今屆賽事首次有球證睇完VAR(視像裁判)後,推翻自己判決嘅情況。不過,巴西命不該絕,補時由菲臘比古天奴同尼馬各入1球,幫巴西以2:0絕殺哥斯達黎加。日前操練受傷嘅尼馬,今場繼續擔正為巴西攻堅,但面對哥斯達黎加嚴密防守,似乎冇乜計,上半場連1次射門機會都冇,仲慘中對手3次「毒腳」。哥斯達黎加防守穩陣之餘,開波初段仲有1次快速反擊,施素波格斯接應傳中,禁區內割草式勁射僅斜出。巴西最有威脅係「耶穌仔」加比爾捷西斯轉身勁射入網,但越位在先食詐胡。菲臘比古天奴、馬些路先後起腳,都無功而還,上半場打和0:0。換邊後,巴西加強攻勢,但眾星腳風唔順,加比爾捷西斯頭槌中楣,菲臘比古天奴禁區外起腳,又被基羅拿華斯擋出,尼馬離門10碼起腳勁射,竟然被基羅拿華斯托出底線。戰至34分鐘出現爭議一幕,尼馬殺入禁區被基安卡路干沙利斯拉跌,荷蘭藉球證古柏斯吹罰12碼,但哥斯達黎加球員向球證提出抗議,古柏斯睇VAR後,改判冇犯規。尼馬愈踢愈躁,仲大力拍皮球,被罰黃牌。戰至補時1分鐘,巴西終於打破僵局,菲臘比古天奴近門篤入,連續2場入波。補時6分鐘,尼馬射入空門,今屆終於開齋,巴西贏2:0,非常驚險。尼馬由地獄返天堂,賽後忍唔住痛哭。巴西現時兩戰取得1勝1和,有4分在手,下仗將鬥塞爾維亞。即上彩報世盃專頁:http://win.on.cc/football/cup2018/ 東網體育FB同你追實體壇每個精彩時刻!http://bit.ly/2ecTF2A Follow東網體育IG一齊撐本地運動員!http://bit.ly/2EYxoRh 


 【世盃講舊史】德甲意甲都試過VAR推翻12碼

 阿根廷最唔想聽到嘅消息