波經
 



即場短訊


【上盤客心聲】由想殺佢老竇到要嗌佢做老竇

【on.cc東網專訊】周五(22日)凌晨阿根廷吞咗克羅地亞「3蛋」,傷透晒真心支持球迷同真金白銀投注咗嘅朋友嘅心,唔少中咗伏嘅朋友,都諗住攞周五晚場巴西對哥斯達黎加嘅救命,由於賽前爭奪熱門之一嘅巴西只得1分,加上陣中有深受香港球迷愛戴嘅尼馬同菲臘比古天奴,自自然然吸引大批上盤客。賽前巴西嘅上盤就係球半/兩球,捧咗場嘅朋友,無論係識波定唔識波定係扮識波,由一開波充滿期待,到半場開始擔心,到90分鐘準備搣飛,情緒指數幾乎未正過數。直至古天奴喺90+1近門射入,原本烏雲蓋頂嘅巴打,終於見到曙光,不斷為巴西打氣,一時間「畀啲道德入多球!」、「唔好去角球旗呀!」、「哥斯達黎加啲後衞咁盡責做咩呀!」等等完全有違倫常、但又充滿上盤客憧憬嘅心聲,全部轉化成鏗鏘嘅打氣聲。整鬼全場不斷向球證投訴對方球員侵犯佢嘅尼馬,呢個時候喺近底線位置,有波在腳唔傳出嚟中間畀隊友,反而玩嘢想用單車腳挑過對方,「咁踢波法唔踢你都對自己啦!」、「踢死你都唔好講」、「我唔止想殺佢仲想殺佢老竇!」,斷人衣食尤如殺人父母,斷人上盤一樣罪大惡極。點知,尼馬喺90+7入波,挽救晒所有上盤客,亦挽救咗自己嘅名聲。原本想殺尼馬老竇嘅,唔止唔殺,直情想嗌尼馬做老竇添。大家身邊嘅上盤客係唔係咁呢?我身邊有好多,包括我自己!


 BA獨取26分 滿貫險勝遊協殺入甲一季後賽

 【世盃講舊史】德甲意甲都試過VAR推翻12碼