波經
 



即場短訊


【世盃戰報】冰島12碼唔入 吞尼日利亞兩蛋

【on.cc東網專訊】尼日利亞擊敗冰島,於「死亡D組」搵到生機!首仗演出惹人好感嘅冰島,雖然上半場稍有優勢,但換邊後未企穩陣腳,就畀對手阿密特穆沙建功,之後呢名莫斯科中央陸軍前鋒再入1球,帶領球隊2:0擊敗冰島。尼日利亞贏波後3分在手,只要下仗守和阿根廷,冰島又未能擊敗克羅地亞,超霸鷹就能殺入16強。冰島上半場表現積極進取,反擊快速具效率,不過佢哋始終係打防反為主,要主動搶攻係有啲勉強,尼日利亞就踢得好沉,睇得出球員有戰意,但攻門欠技術,後防亦見鬆散,竟然要靠19歲門將烏素浩頂住,半場唔輸好彩。但換邊後尼日利亞好快開紀錄,49分鐘,阿密特穆沙禁區內右腳納定右路傳中,抽近柱搞掂,領先1:0。之後冰島一路受壓,巴洛根頭槌僅僅高出,穆沙更曾射中楣。但呢名中央陸軍射手始終再入多粒,佢於左路壓入禁區,再扭過埋對手門將,控定右腳射入,領先到2:0。冰島之後博得12碼,但王牌基菲爾施古臣宴客,尼日利亞贏2:0完場。好多球迷關心阿根廷嘅出線形勢,目前克羅地亞6分已肯定出線,尼日利亞3分,阿根廷同冰島就各得1分。今仗如果冰島贏波,下仗冰島同克羅地亞只要打和就齊齊晉級,對阿根廷極為不利。現時阿根廷只要擊敗尼日利亞,而為保首名出線嘅克羅地亞保不敗,阿根廷就可出線16強,故冰島輸波,對阿根廷嚟講較為有利。


 奧當踩落修頓!自爆與BA在港開籃球學校

 【不斷更新】沙基利絕殺 瑞士反勝塞爾維亞