波經
 



即場短訊


丹麥最後1仗冇黑腳 應該唔會再輸12碼

【on.cc東網專訊】即上彩報世盃專頁:http://win.on.cc/football/cup2018/ 周四(21日)晚世界盃早場C組,丹麥由熱刺中場基斯甸艾歷臣打開紀錄,但「黑腳」尤素夫保臣連續2場於禁區內犯規,連累球隊被判罰12碼,澳洲由積甸拿克射入逼和1:1。丹麥由3分變1分,但「好消息」係尤素夫保臣下場「坐波監」,無緣對法國,反而可能會增添丹麥出線機會。丹麥挾上仗贏波餘威,開賽僅7分鐘,就由基斯甸艾歷臣凌空抽射破網,領先1比0,入波後得勢不饒人,憑較佳控球能力,圍攻澳洲。其中薛斯圖離門30幾碼勁射,但角度太正,被澳洲門將馬菲賴恩接住,尼高拉佐真遜離門6碼竟然頂去柱邊出界。丹麥未能擴大優勢,踢到33分鐘就出事,澳洲前鋒馬菲歷基迎頂角球,「丹麥細哨」尤素夫保臣疑似犯手球,球證睇完VAR(視像球證)重播後,吹罰12碼。尤素夫保臣仲被罰黃牌,連續2場食黃牌,最後1場分組賽停賽。澳洲由積甸拿克主射12碼入網,追和1比1完上半場。換邊後,雙方加快比賽節奏,特別係澳洲首場輸波,今場唔想再失分,比賽中後段狂攻丹麥。67分鐘丹麥門將卡斯柏舒米高出迎失誤,馬菲歷基把握傳中,眼見羅比古斯要射門空,卻被達斯古特快一步解圍。阿倫穆爾勁射僅高出,轉個頭隊友湯洛積起腳,又被卡斯柏舒米高接住。最終丹麥成功守和1:1,兩戰有4分,出線形勢不俗,反觀澳洲兩戰只有1分,下仗鬥秘魯非勝不可。東網體育FB同你追實體壇每個精彩時刻!http://bit.ly/2ecTF2A Follow東網體育IG一齊撐本地運動員!http://bit.ly/2EYxoRh 


 英雄變炸彈!尤素夫保臣12碼、黃牌打孖上

 球場內「中國第一」廣告 觸犯約束惹非議