波經
 



賽後報道


莫迪歷34歲生日克羅地亞贏唔到

9月9號係世界足球先生莫迪歷嘅34歲生日,呢位「壽星公」帶領克羅地亞出戰歐國外更用入波作為禮物,不過結局就相當可惜,呢支世界盃亞軍作客被世界排名109位嘅阿塞拜疆逼和1比1,目前雖然排E組榜首,但同斯洛伐克、匈牙利同威爾斯成績非常接近,出線形勢不容樂觀。

克羅地亞今場雖然有7成控球,射門次數亦達21次,但只係靠莫迪歷射入12碼領先,而且喺72分鐘被阿塞拜疆神奇追和。阿塞拜疆喺歐國外之前4戰全敗,呢1分係佢哋今屆第1分,克羅地亞真係乜面都冇晒。

上年勇奪世界盃亞軍,好可能係克羅地亞滑落前嘅最後光輝,莫迪歷、拿傑迪錫兩位世界級球星已經34歲同31歲,比列錫、洛夫雲等多年主力亦都3字頭,最大問題係球隊一直培育唔到新人接班,莫講話要去到莫迪歷呢啲世界級,要搵一個喺國家隊孭飛嘅都難,進攻中場阿倫夏利洛域5年前加盟巴塞隆拿曾被寄以厚望,但近年外借生涯都上唔到位,似乎係「流星」居多。

克羅地亞依家仍然係靠莫迪歷單天保至尊,不過呢位皇家馬德里中場每過1次生日,克羅地亞就向衰落行近1步,莫迪歷仲可以撐得幾耐?


 壓力下反彈 德國挫北愛登榜首

 占士入亨利式金球