波經
 



賽後報道


3次助攻入埋波比利時大勝

睇番國際球壇球星,美斯、C朗係球王級,尼馬就星味滿瀉,不過講到實際作用,奇雲迪布尼完全唔輸蝕。呢名曼城頂級中場,歐國盃外圍賽代表比利時作客蘇格蘭,只用咗23分鐘就完成3次助攻,之後更攻入埋齋波,堅係一個打晒,協助比利時作客大勝4比0。「歐洲紅魔」今次國際賽檔期連續兩場炒對手4蛋,喺I組6連勝積18分傲視群雄。

迪布尼於開賽9分鐘,就殺入禁區橫傳盧卡古先開紀錄,24分鐘右路出招牌靚波,華美倫近門射入拉開比數,32分鐘開出右路角球,艾達韋列特升起頭槌破網,輕輕鬆鬆完成助攻帽子戲法。查實之後迪布尼多次於蘇格蘭後防心臟地帶妙傳,如非其他隊友射失,迪布尼助攻次數唔只咁少。到完場前8分鐘,迪布尼於進攻左路起右腳射遠柱搞掂,貢獻完美演出。

迪布尼上季因傷關係出場機會減少,但本季已經全面復甦,5次為曼城上陣貢獻5次助攻,今場又再加3次,即係今季頭6場比賽,迪布尼已經作出8次助攻,效率之高極度恐怖,如果嚟緊冇傷冇病,迪布尼精彩演出陸續有來。

另外,備受全球球迷同Game迷期待嘅《FIFA20》,日前公布新一集嘅球員能力值,旋即引起網民熱烈討論,其中美斯壓倒C朗拿度成為「地上最強」、奇雲迪布尼擊敗華基爾雲迪積克當選「英超第1」,都引起球迷唔少爭論。

《FIFA20》日前公開新遊戲100大球星,巴塞隆拿前鋒美斯以94分成為No.1,C朗拿度(93分)同尼馬(92分)排第2同第3位。事實上,上年《FIFA19》入面兩大球王同得94分平分秋色,前年《FIFA18》C朗更加以94分力壓93分美斯封王。呢2年嘅轉變,意味遊戲開發商認為C朗一直走緊下坡,喺呢場永遠冇共識嘅「球王爭論」當中偏向美斯。

利物浦中堅華基爾雲迪積克雖然被視為今年世界足球先生大熱,不過喺遊戲入面佢連「英超第1」都做唔到,呢位荷蘭中堅只有90分,輸畀曼城中場奇雲迪布尼(91分),後者上季受到傷患困擾,但依然可以騎住VVD,難怪唔少利物浦球迷都詐型!




 壓力下反彈 德國挫北愛登榜首