波經
 



賽後報道


爭射12碼宴客累曼聯失分

普巴又宴客,紅魔遭「狼」咬走2分!開季大勝嘅曼聯未能延續強勢,昨晨喺英超獨腳戲作客狼隊只能踢成1比1。曼聯失分關鍵,就係保羅普巴下半場射失12碼,雖然佢宴客後雙手抱頭,完場後再用波衫笠頭表現到好懊悔,但依然畀名宿同球迷狂插!

今仗曼聯有個好開始,上半場憑一次快攻,拉舒福特妙傳畀安東尼馬迪爾入楔勁射破網,領先1比0完半場。不過,狼隊下半場初段發惡圍住嚟砌,終被把握一次角球機會,魯賓尼維斯禁區頂一腳世界波右上角楣底死角入網,門將迪基亞飛盡都撲唔到,狼隊扳平1比1。一直有離心嘅普巴原本可以做贏波英雄,戰至68分鐘佢博得12碼,原本以為由上仗一射中鵠嘅「福仔」操刀,點知二人商量後由普巴主射,結果畀狼隊門將捉到路撲出,令曼聯錯失再度領先機會,踢成1比1完場。

據《bet365》統計,自2015年以來,普巴總共主射15次12碼,共5次射失,但計算拉舒福特2015年出道以來,共主射6次12碼全部入晒,包括今季開咧戰對車路士先開紀錄嗰球,正路福仔先係12碼首席劊子手。

普巴爭射宴客後,名宿連尼加評論時話呢個決定「令人�爆頭」,而另一名宿加利尼維爾亦表示:「點解要喺球場上討論邊個主射?我好唔鍾意咁樣,要知道普巴過去12個月射失4球,而拉舒福特剛喺上仗射入過12碼,好遺憾球場內曼聯並無領袖。」至於網上嘅球迷鬧得仲激,瘋狂以帶有歧視成分嘅留言辱罵,甚至揚言要「殺死普巴」!

雖然當事人之一拉舒福特澄清冇「爭射」情況,而對於今次12碼風波,領隊蘇斯克查賽後詳細解釋:「佢哋兩個(普巴同拉舒福特)都係預設嘅劊子手,到時邊個操刀由佢哋自己決定,上星期拉舒福特有信心,今個星期保羅普巴更有信心,我鍾意有自信嘅球員。」道理上「前線做決定」的確係講得通,不過曼聯將來再有12碼,球迷想邊個操刀,相信大家都會有共同答案。





 連格隱形8個月數據捧蛋