波經
 



賽後報道


德盃首圈輕取科特布斯

拜仁慕尼黑喺昨晨德國盃第1圈作客3比1輕取科特布斯,衞冕取得好開始。科特布斯雖已降落第4級別聯賽,不過拜仁依然強陣出擊,包括新加盟嘅法國守將班捷文柏華特及上季養傷嘅中場哥倫天杜利素都打正選,最終憑利雲度夫斯基、京士利高文及後備上陣嘅哥列斯卡入波淘汰對手。

由於曼城翼鋒利萊辛尼長抖,拜仁搵「2R」接班人唯有轉移目標,經過連日努力,終成功借得效力意甲國際米蘭嘅克羅地亞翼鋒比列錫,他日前已經去咗拜仁接受體測,主帥尼高高華喺德盃賽後亦呢位30歲翼鋒即將加盟。據報比列錫會以500萬歐元借用一季,之後拜仁有買斷權,買斷費係2,000萬歐元。比列錫曾效力多蒙特及禾夫斯堡,加上仲係尼高高華同鄉,適應絕對唔係問題。

此外,據報拜仁仲有意思借用巴塞隆拿中場菲臘比古天奴,雖然有傳「古仔」可能轉投PSG,作為巴塞回購尼馬嘅籌碼,不過拜仁願意承擔古仔1,100萬歐元年薪,將可大大減輕巴塞負擔,令「古仔」轉會仲有唔少變數。