波經
 



賽後報道


靠冤枉12碼奠定大勝

C朗日前連中三元為祖雲達斯反Cup馬體會,宿敵美斯亦不甘示弱,周四凌晨亦喺歐聯16強次回合大爆發,主場鬥里昂交出兩入球兩助攻的球王級表現,以5比1大炒對手,兩回合計以同樣比數獲勝,連續12季殺入8強。不過里昂會長奧拿斯就嬲嬲豬,鬧爆巴塞先開紀錄嘅12碼,球證判決係嚴重錯誤。

首回合雙方打成0比0,返回主場嘅巴塞隆拿次回合大勝其實亦唔出奇,不過「地上最強」喺上半場18分鐘所獲得嘅12碼,就未必個個認同;當時蘇亞雷斯殺入禁區後被里昂後衞積臣丹拿雅飛剷,球證立即判罰12碼,睇番慢鏡其實係蘇亞雷斯踩落積臣丹拿雅腳面,美斯唔理咁多主射極刑,仲要細細力射中間入網。31分鐘蘇亞雷斯再造就菲臘比古天奴射空門,巴塞上半場領先2比0。

下半場里昂一度由盧卡斯杜沙特亂軍中破蛋追成1比2,但要再入波就冇機會;78分鐘美斯個人表演,連扭數名敵衞再用私家右腳射死角入網,巴塞贏到3比1。81分鐘美斯12碼點橫傳碧基射空門湊成4比1,86分鐘美斯另一妙傳造就奧士文尼迪比利埋齋,巴塞最終大勝5比1完場。

眼見里昂會長奧拿斯為先失一球嬲到噴火:「呢個12碼判決非常瘋癲,里昂未必勁過巴塞隆拿,但賽果反映唔到事實。」當事人蘇亞雷斯亦火上加油:「係我唔小心踩落積臣丹拿雅隻腳度,之後就失平衡跌低,球證其實可吹可唔吹。」咁講都得?擺明唔應該吹啦!


 紅軍踢走拜仁