波經
 



賽後報道


紅軍踢走拜仁

利物浦作客以3比1擊敗德甲6連霸盟主拜仁慕尼黑,表現充滿說服力,其中前鋒沙迪奧文尼先開紀錄嘅一球,更加係速度、射術、智慧及膽識嘅完美示範,「紅軍」領隊高普賽後大讚:「今場開紀錄嘅入波,我要返屋企睇多500次,文尼真係好犀利!」呢位塞內加爾射手今場入兩球,係佢為利物浦累積第7個歐聯作客入球,超越謝拉特及羅拔圖法明奴(6球),成為「紅軍」史上最多歐聯作客入波球員,難怪盛傳皇馬教練施丹回巢後都視佢為羅致目標。

除咗文尼之外,中堅華基爾雲迪積克(VVD)亦係另一最大功臣,今場VVD對拜仁交出1個入波及1次助攻,係VVD近4場賽事第3次入波,亦係2007年2月比拿美之後,利物浦首位喺歐聯淘汰賽作客有入波兼助攻嘅球員。而且今場VVD仲交出神級數據,頭槌爭頂成功率100%,搶斷成功率100%,5次成功解圍,3次成功攔截,傳球成功率達85%,係利物浦全隊之冠,最重要梗係將拜仁中鋒羅拔利雲度夫斯基嘜到貼貼服服,限制對方只得1次射中龍,咁高質嘅表現,連老闆利物浦班主約翰亨利都忍唔住高舉手指公,賽後喺社交網貼相留言:「地球表面有75%被水覆蓋,其餘25%由華基爾雲迪積克覆蓋!」可以見到VVD幾咁犀利。




 靠冤枉12碼奠定大勝