波經
 



賽後報道


熱刺捉狐狸壯行色

尋晚英超頭場,熱刺靠基斯甸艾歷臣助攻兼入波,加上敵將「華Dee」占美華迪未熱夠身即操刀12碼宴客,喺溫布萊球場以3比1擊敗「狐狸」李斯特城。

由於熱刺兵源緊絀,就算有歐聯顧慮,基斯甸艾歷臣、孫興民等主力都要頂硬上,反而李斯特城意外地冇畀王牌「華Dee」占美華迪擔正,33分鐘熱刺右閘捷比亞開出短角球,基斯甸艾歷臣再斬入禁區,達雲臣山齊士(圓圖)插水式頭槌頂成1比0,呢球亦係佢加盟熱刺後首個士哥。

易邊後李斯特城積極反撲,60分鐘占士麥迪臣博到12碼,同時間主帥佩爾換入占美華迪,勢估唔到佢一入場即決定操刀,點知腳頭無靈,被熱刺門將洛里斯捉到應救出,似乎未熱夠身喎。你錯過扳平良機,轉過頭喺3分鐘之後,基斯甸艾歷臣就轟入遠射靚波,領先2比0,雖然之後華迪將功補過追番球,可惜完場前孫興民建功,助熱刺贏3比1聯賽3連勝,並為周中歐聯對多蒙特壯行色。


 卡雲尼傷埋CNM得番麥巴比

 巴利升呢「百球先生」