波經
 



賽後報道


卡雲尼傷埋CNM得番麥巴比

PSG大鑊了!擁有「CNM鋒線」嘅法甲豪門巴黎聖日耳門(PSG),再遭受重大打擊。繼尼馬之後,另一位射手卡雲尼喺昨晨法甲主場對波爾多時傷出,嚟緊周三(13日)凌晨佢哋轉戰歐聯16強,就只能靠基利安麥巴比孭飛,作客近況大勇嘅曼聯,PSG想贏?有啲難度囉!

PSG今場對波爾多原本收起基利安麥巴比、迪馬利亞為歐聯留力,可惜表現麻麻,要等到42分鐘先至博到12碼,由卡雲尼主射入網領先1比0。不過,轉個頭呢位烏拉圭射手就被對手踢傷,拐下拐下離場,下半場開波時,教練杜曹立即用基利安麥巴比入替,雖然最終保住1比0勝果到完場,但除咗卡雲尼傷出,主力後衞梅尼亞比賽末段同對手相撞之後,亦被換離場。

由卡雲尼、尼馬、基利安麥巴比組成嘅「CNM鋒線」,今季法甲為PSG合共攻入47球,佔球隊聯賽士哥嘅7成,尼馬長抖之下,如果連卡雲尼都傷埋,就剩下基利安麥巴比單打獨鬥,到時曼聯只要專注凍結呢位法國新星,就可以癱瘓PSG進攻。

另一邊廂,曼聯自領隊蘇斯克查上任後,走勢強勁,前晚喺英超大勝富咸一仗,法國中場保羅普巴個人梅開二度,今季英超26場波已累積入咗11球,係佢球員生涯首次單季聯賽入波達雙位數,狀態比喺佢效力祖雲達斯時更堅!況且佢哋仲有另一位法國國腳安東尼馬迪爾,佢今場都入咗1球,今季英超亦有9球進帳,有呢對「法國孖寶」,相信蘇B可以「以法制法」,靠兩位法國人合力拆「門」。





 熱刺捉狐狸壯行色