波經
 



賽後報道


淘汰PSG甘岡爆25倍冷W

當聯賽同歐聯都有胡叫,普通盃仔未必係你杯茶;法甲豪門巴黎聖日耳門雖然星將如雲,但喺周四凌晨進行嘅法國聯賽盃8強賽事,竟然主場輸1比2遭弱旅甘岡踢出局,勁爆25倍客W。至於曼城爭英超有利物浦做攔路虎,所以踢英格蘭足總盃4強首回合唔敢怠慢,憑「耶穌仔」加比爾捷西斯個人獨取4球,主場大勝伯頓9比0。

衞冕法聯盃嘅巴黎聖日耳門強陣出擊,新舊球王尼馬、基利安麥巴比擔正,只係收起卡雲尼,以質素計預期可大勝一場,但可能球星放假玩得太盡,今仗攻勢唔到肉,半場0比0。有唔少攻勢嘅甘岡去到下半場博到12碼,可惜98法國世盃功臣杜林個仔馬古斯杜林射失,滿以為尼馬喺63分鐘頭槌建功帶領PSG逃過大難?咁就錯喇,因為甘岡失守後反而仲搏命,81分鐘先由尼格巴高圖射入12碼扳平,去到93分鐘甘岡再獲極刑,馬古斯杜林今次冇甩拖,最終甘岡憑3個12碼將之前法聯盃5連霸嘅PSG淘汰出局,開出25倍客勝,球迷一地眼鏡碎。

至於早前經過一輪低潮嘅曼城就唔敢輕視任何對手,今輪英足盃對手雖然只係甲組仔伯頓,但輪換陣容依然星光熠熠,加比爾捷西斯、馬列斯、利萊辛尼充當3箭頭,辛真高、奇雲迪布尼、艾利真歷梅歷治等亦正選亮相,結果一場大屠殺由奇雲迪布尼喺開賽5分鐘揭開序幕,被指狀態低沉嘅加比爾捷西斯更頭頂腳射入夠4粒,最終大勝9比0,賽後睇見伯頓球員輸到頭耷耷,真係慘情。