波經
 



賽後報道


險勝屈福特 15戰「+38球」

昨晨英超快車起動,榜首曼城作客以2比1擊敗屈福特,今季15場聯賽錄13勝2和近乎無敵嘅成績,更加犀利嘅係,佢哋喺15場聯賽攻入45球而只失7球,「+38球」嘅得失球差係英格蘭頂級聯賽近125年嚟同期最好!對上一支有咁強數據嘅球隊,已經係19世紀嘅事,勁到「爆汁」!

曼城嚟緊周日聯賽要惡鬥車路士,下周中又有歐聯,所以領隊哥迪奧拿對「屈仔」時作出輪換,收起史達寧,由加比爾捷西斯擔正攻堅,馬列斯、大衞施華就復任正選。雖然加比爾捷西斯狀態勁曳,「餐士」多多依然射唔入,不過曼城仲有馬列斯!呢位阿爾及利亞大將今仗盡顯卡士,踢得勁瀟灑,完半場前就斬個靚波畀利萊辛尼開紀錄,易邊後自己起左腳搞掂,助曼城領先到2比0。到85分鐘屈福特由杜哥利破蛋,於補時階段更獲得兩個角球,搞到曼城門前風聲鶴唳,好在有驚無險,曼城保住2比1勝局完場。

曼城目前喺聯賽13勝2和,入45球僅失7球,得失球差為「+38」,翻查歷史,原來呢個成績係英格蘭頂級聯賽近125年嚟同期最好,對上一支咁「瘋狂」嘅球隊,已經係數到1892至93球季嘅新特蘭,當時佢哋頭15場聯賽錄得「+39球」得失球差,該季新特蘭亦順利贏得聯賽冠軍。

不過,曼城坐擁一大堆頂級球星背後,青訓球員就苦無上陣機會,結果唔少明日之星離隊,繼查頓辛祖遠走德甲多蒙特後,英國傳媒爆料,19歲中場巴謙戴亞斯已決定離隊,加盟皇家馬德里。呢位西班牙U21球星雖獲領隊哥迪奧拿重點栽培,可惜曼城中場勁人太多,冇乜前途可言,報道指佢已經同皇家馬德里達成個人協議,明年夏天約滿後就「上艦」,周薪為6萬鎊。