波經
 



賽前分析


朗尼宣布離隊損軍心

聽朝美職有場東岸大戰,華盛頓聯隊主場鬥紐約紅牛。華盛頓球星朗尼宣布明年1月季後離隊,餘下日子自然想「好頭好尾」,可惜球隊唔爭氣,狀態曳之餘,近年對親紅牛都冇甜頭,難有讓波本錢,一於撐紅牛讓球客勝。

(myTV Gold 301、Now 638、有線614及654台周四早上8時直播)

華盛頓聯隊自從去年引入英格蘭球星朗尼後,由以往陪跑分子搖身一變成為爭奪季後賽資格嘅強隊,呢位前曼聯Icon加盟後助攻助守,仲帶動其餘隊友全面升呢。今季朗尼繼續成為華盛頓嘅頭號射手,肩負領軍衝擊季後賽重任,火速成為球迷寵兒。可惜天下無不散之筵席,盛傳朗尼妻兒一直適應唔到美國生活,嘈住要返英格蘭,「月巴」亦只好跪低妥協,早前宣布明年1月轉會窗重開,就會回歸英格蘭球壇投效打比郡,出任球員兼教練。不過唔知係咪消息打擊隊內士氣,華盛頓聯近期表現跌晒Watt,近5戰只得1勝1和3負,當中包括主場畀費城聯狂數5比1,現時難予人信心。

作客嘅紅牛力爭季後賽席位場場鍊到盡,今季除咗靠奧地利進攻好手丹尼爾萊亞領軍外,小將拜恩韋德亦成功上位,至今為紅牛射入9球,火力有保證。加上紅牛近8次同華盛頓聯隊交手,獲4勝4和不敗佳績,甚有格食格味道,今仗作客有力搶分而回,讓球客勝值得一試。




 小保加如虎添翼有利可圖