波經
 



賽前分析


未弗紅軍 Vs 新敗車仔

今晚喺土耳其伊斯坦布爾舉行嘅歐洲超級盃爆發英超內訌,上屆歐聯盟主利物浦火併上屆歐霸盃冠軍車路士。紅軍3叉戟之一沙迪奧文尼狀態未弗,而且門神艾利臣比加因傷缺陣,必定先鞏固防守;而剛於聯賽慘敗嘅車仔,交足學費嘅主帥林柏特,更加唔敢冒進,2.5球嘅入球細穩開。

(myTV Gold 303、Now 643、有線656及616台周四凌晨3時直播)

利物浦今夏有多名主力要踢「太公波」,當中包括王牌穆罕默德沙拿、羅拔圖法明奴、沙迪奧文尼及艾利臣比加等較遲歸隊,文尼更喺上周先返回球會報到,上場開咧戰只是後備上陣,狀態有待提升。雖然紅軍喺開鑼戰大勝諾域治4比1,但對手只是升班球隊,早前社區盾面對勁敵曼城即失冠,今場鬥另一Big 6分子,隨時再受考驗。主帥高普堅持唔增兵,副選拉爾拉拿、阿歷士張伯倫嘅實力點都爭啲,加上門神艾利臣比加受傷抖4至8周,今場更會先穩住防線,謀定而後動。

車仔今夏受「禁買令」限制,又有夏薩特、大衞雷斯等主力離隊,只靠收回巴舒亞伊、美臣蒙特、基斯甸普列錫等借將補充實力。新帥兼名宿林柏特經驗不足,只教過英冠打比郡1季咁大把,上場開咧戰更慘吞曼聯4蛋,尤其係幾次中場斷纜,畀人打突擊搞到防線風聲鶴唳,短時間內接連失波導致大敗,雙中堅葛特蘇馬同安達斯基斯坦臣速度、轉身都慢,另一守將魯迪格又未好番,林伯只能地莊出擊,一定唔敢亂攻。兩軍近6次交手亦只入12粒,其中5次開2球或以下,捧2.5球嘅細盤最穩陣。




 新兵基斯甸柏禾有料到銀河主場搶W