波經
 



球場內外


PSG隊醫爆舊患難斷尾

尼馬轉會單嘢,一直喺巴黎聖日耳門(PSG)、巴塞同皇馬之間兜兜轉轉,原來唔係單純因為價錢,最大問題係佢有極高嘅跛腳風險!

呢單消息係巴塞、皇馬為壓價放嘅風?唔係!消息係嚟自巴黎聖日耳門醫療團隊咁先頂癮。法國《巴黎人報》訪問咗幾名PSG隊醫,佢哋認為長期困擾尼馬嘅右腳跖骨傷患,可能因為巴西嘅醫療方法不當,一直未能根治,假如「喺高水平比賽打波,隨時有復發嘅可能」,老實得嚟似乎喺度幫聖日耳門倒米。

過去18個月內,尼馬右腳跖骨兩次斷裂,先係2018年2月法甲對馬賽時受傷,導致提早收咧。今年佢又再傷埋同一個地方,足足抖咗4個月,連美洲國家盃都踢唔到。

有啲咁嘅病歷,巴塞對於係咪接受佢回巢都好審慎,《阿斯報》就爆佢哋上個月諮詢咗醫生意見,對方都話尼馬嘅舊患康復得唔理想,重新接駁過條骨,可能係徹底解決問題嘅最佳辦法。咁即係話,簽番尼馬就要預咗幾個月白支人工,等佢搞番掂隻玻璃腳。

巴黎聖日耳門對呢件事點回應呢?大家估都估到,體育總監李安納度向《RMC Sports》否認《巴黎人報》嘅報道,強調尼馬已經完全康復。


 古天奴成仁紅軍唔見2.18億