波經
 



球場內外


阿仙奴冇後福撞正拿玻里

歐霸8強同日亦完成抽籤,兩支倫敦勁旅命運各異,車路士抽到上籤,8強對捷克球隊布拉格斯拉維亞;阿仙奴就冇咁好彩,遇上有比利時攻擊手梅頓斯壓陣嘅意甲「2哥」拿玻里。另外西甲將會出現內訌,主帥馬些連奴帶領華倫西亞倒戈鬥前東家維拉利爾,重演2003/04賽季足協盃(歐霸盃前身)4強戲碼。

阿仙奴喺周五凌晨上演嘅16強次回合,成功收復首回合落後1比3劣勢,主場大炒法甲雷恩3比0,兩回合計贏4比3過關,領隊艾美利嘅「歐霸盃之王」招牌暫時仲保得住。阿仙奴今仗決心極大,頭15分鐘就憑奧巴美揚及美蘭尼爾斯連轟兩粒,總比數追平3比3,更有1個作客入球而佔上風。下半場奧巴美揚再建一功,個人梅開二度,加上尾段門將施治力挽狂瀾,兵工廠逆轉成功進身8強。

至於車路士晉級就輕鬆得多,遠征烏克蘭有基奧特連中三元,作客再炒基輔戴拿模5蛋,兩回合計贏8比0。不過近年喺歐霸盃威晒嘅西維爾就爆冷出局,次回合作客布拉格斯拉維亞踢成2比2,總比數4比4進入加時,西維爾喺加時階段兩度失守,次回合輸3比4,兩回合計負5比6,8年嚟首次喺歐霸盃被淘汰出局。


 藍月亮熱刺演英超內訌

 48年最惡!英超Big 6歐賽話晒事