波經
 



球場內外


藍月亮熱刺演英超內訌

歐聯8強激爆夢幻對決!幾經辛苦晉級嘅曼聯,尋晚於8強抽籤抽到下下籤,要硬撼有球王美斯領軍嘅「地上最強」巴塞隆拿,睇吓看守領隊蘇斯克查能否帶領球隊再創奇迹;同市死敵曼城則同熱刺合演英超內訌,上屆亞軍利物浦面對葡超班霸波圖、C朗壓陣嘅祖雲達斯則火併16強淘汰皇馬嘅阿積士,表面睇都算好籤咯。

尋晚歐洲足協於瑞士尼翁為歐聯8強進行抽籤,並邀得2010年為國米封王嘅門神施薩索拉斯擔任抽籤嘉賓,最終抽出「夢幻對決」,喺16強絕地反勝巴黎聖日耳門嘅曼聯又抽到衰籤,要硬撼「地上最強」巴塞隆拿,雙方近8次喺歐聯交手,曼聯只得1勝4和3負,包括09及11年兩屆決賽敗陣。不過曼聯自看守領隊蘇斯克查接手後重拾「魔性」,20年前佢補時建功替紅魔反勝拜仁奪冠嘅奇迹之夜,場地正係巴塞主場魯營球場,8強次回合「蘇B」重遊福地,分分鐘又創奇迹。

今屆歐聯另一焦點,就係有4支英超球隊殺入8強再造盛世,果然出現「英超內訌」,曼城繼上屆8強對利物浦後,今屆再遇英超老對手熱刺。雖然「藍月亮」勇達巔峰,但翻查紀錄呢支英超「1哥」近4次喺歐洲賽對番「自己友」,竟然全部輸晒,包括上屆畀「紅軍」雙殺,值得留意係連埋聯賽在內,曼城於12日內3撼熱刺,之後一場聯賽就惡鬥同市曼聯,對正力爭4冠王嘅曼城嚟講,絕對係魔鬼賽期。經抽籤後曼城以2.9倍成頂頭大熱。

上屆亞軍利物浦抽中波圖屬好籤,兩軍上屆16強交過手,當時「紅軍」作客先贏5球,主場就Hea踢悶和0比0,今屆再遇心理上佔盡優勢。至於16強靠C朗反勝馬體會嘅祖雲達斯就火併阿積士。尋晚同場順便抽埋4強形勢,曼聯對巴塞、利物浦對波圖屬於下線區,因此勝方將於4強交手。






 阿仙奴冇後福撞正拿玻里