波經
 



球場內外


般尼恃弗掟赫特踢英冠

般尼唔用前英格蘭國家隊門將赫特把守最後一關之後,聯賽連盃賽神奇3連勝;根據英國傳媒報道,球會高層見咁順無謂再變陣,赫特可能因此被兜走,有指佢將轉到英冠球隊普雷斯頓捱世界!

其實赫特加盟般尼後表現唔錯,仲一度係今季英超撲救次數最多守門員。點知般尼喺「拆禮物日」主場以1比5慘敗畀愛華頓,領隊戴治決定畀機會後備門將湯希頓打正選,結果佢連續兩場聯賽保持不失;日前般尼喺英足盃以1比0贏班士利,更加派出3號門將尼克普比把關都冇失球。

大家都知現代足球世界冇感情講,消息指原本般尼想外借湯希頓去普雷斯頓,依家佢變咗球隊首席門將,般尼唯有改變計劃,反建議普雷斯頓借赫特試用一下。假如真係淪落英冠,赫特仲有冇機會重返英超戰場真係好難講,昔日英格蘭國家隊No.1搞成咁真係陰功。


 奇誠庸受傷太極虎頭痕

 前女友踩多腳鬧心理變態